Thu. May 26th, 2022

ለ6ኛው አገር አቀፍ ምርጫ መረጃ የሚሰበስቡ ከ50 ሺህ በላይ ታብሌቶች ማዘጋጀቱን ብሔራዊ ምርጫ ቦርድ አስታወቀ

ለ6ኛው አገር አቀፍ ምርጫ የምርጫ ጣቢያዎችን መረጃ የሚሰበስቡ ከ50 ሺህ በላይ ታብሌቶች መዘጋጀታቸውን ብሔራዊ ምርጫ ቦርድ አስታወቀ።

በዚህ ዓመት የሚካሄደው ምርጫ ተዓማኒና ግልጽ እንዲሆን በቴክኖሎጂ የታገዘ ለማድረግ እየሰራ መሆኑን ቦርዱ ገልጿል።

ከማዕከላዊ ስታስቲክስ ኤጀንሲ ጋር በመተባበር 50 ሺህ 900 ታብሌቶችን ማዘጋጀቱን ነው ቦርዱ ያስታወቀው።

ለአንድ ምርጫ ጣቢያ አንድ ታብሌት ለመላክ ታሳቢ መደረጉንም አክሏል።
የቦርዱ የኮሙኒኬሽን አማካሪ ወይዘሪት ሶሊያና ሽመልስ ለኢዜአ እንደተናገሩት የምርጫ ጣቢያዎች ምርጫውን ለማካሄድ ብቁ መሆናቸውን፣ ያሉበትን ክልልና ወረዳ ማጣራት ተደርጓል።

የተዘጋጁት ታብሌቶችም የምርጫ ጣቢያዎችን ትክክለኛ መገኛ በካርታ ላይ ለማስፈር የሚያግዙ መረጃዎችን ለመሰብሰብ የሚረዱ መሆናቸውን አብራርተዋል።

ታብሌቶቹ ለፖለቲካ ፓርቲዎች፣ ለመራጩ ሕዝብና ለሲቪክ ማኅበራት መረጃዎችን በቀላሉ ለማግኘት እንደሚረዱ ነው የጠቆሙት።

በየአካባቢው የሚገኙ የምርጫ ጣቢያዎች ከመራጩ ሕዝብ ጋር ተመጣጣኝ መሆናቸውን ለማወቅም ያስችላሉ እንደ አማካሪዋ ገለጻ።

ለምርጫ ጣቢያዎች የሚላኩት ታብሌቶች ከመራጮች ምዝገባና ድምጽ መስጠት ጋር እንደማይገናኙም አስረድተዋል።

ስድስተኛው አገር አቀፍ ምርጫ በኮቪድ-19 ወረርሽኝ ምክንያት በልዩ መመሪያዎችና የጤና ፕሮቶኮሎች እንዲካሄድ የጤና ሚኒስቴር በመከረው መሰረት እየተሰራ መሆኑንም አማካሪዋ ገልጸዋል።

ቦርዱ የምርጫው የጊዜ ሰሌዳ ከመውጣቱ በፊት በወረርሽኙ ምክንያት ምርጫ ጣቢያዎችንና የምርጫ አስፈጻሚዎችን እንዲሁም የተጨማሪ ሃብት አስፈላጊነትን እያጤንኩ ነው ብሏል።

ብሔራዊ ምርጫ ቦርድ ለምርጫው የሚያስፈልጉ ቁሳቁሶች ዝግጅቱን 90 በመቶ ማጠናቀቁን መግለጹ ይታወሳል።

By Chala Dandessa

Name: Chala Dandessa. I was born in West Shewa Zone, Chobi District of Oromia Region, Ethiopia in 1989. Currently I am Lecturer at Jimma Teachers College.

Leave a Reply

%d bloggers like this: